“Cobalt” ва “ZIL” тўқнашуви фуқаро ўлимига сабаб бўлди
Оммавий ахборот воситаларида деярли ҳар куни юртимизнинг турли ҳудудларида содир бўлган йўл-транспорт ҳодисалари ҳақидаги хабарлар қулоққа чалинади, ачинарлиси, уларнинг аксарияти ўлим билан якун топмоқда.
Жиззах вилояти Ғаллаорол тумани Кўкгумбаз маҳалла фуқаролар йиғини ҳудудидан ўтган Тошкент – Термиз М-39 йўлининг 1004- километрида Жиззах шаҳри Aмир Темур маҳалласида яшовчи фуқаро бошқарувидаги “ZIL”ни йўлнинг белгиланмаган жойидан буради. Оқибатда, қарама-қарши йўналишда ҳаракатланаётган Қашқадарё вилояти Қарши шаҳри Янгисарой маҳалла фуқаролар йиғинида яшовчи шахс бошқарувидаги “Сobalt” “ZIL”га урилган.
Оқибатда, “Cobalt” йўловчиси, Қашақадарё вилояти Косон тумани Оқтепа маҳалла фуқаролар йиғинида истиқомат қилган фуқаро тан жароҳати олиб, воқеа жойида вафот этган. Мазкур автоулов салонида бўлган Қарши шаҳри Бешкент маҳалла фуқаролар йиғинида яшовчи яна бир шахс оғир даражада тан жароҳати билан туман тиббиёт бирлашмасининг жонлантириш бўлимига ётқизилган. Ҳолат юзасидан жиноят иши қўзғатилди.
Эслатиб ўтамиз, аввалроқ Нукусда “Matiz” маст пиёдани уриб юбориши оқибатида пиёда шифохонада вафот этгани ҳамда Юнусободда юз берган ЙТҲ бир инсон ўлими билан якун топгани ҳақида хабар берилганди.
