“Толибон” раҳбарияти БМТдан ёрдам сўради
“Толибон” сиёсий офиси раиси ўринбосари Шер Муҳаммад Аббос Станекзай Қатарда БМТ Бутунжаҳон озиқ-овқат дастури вакиллари билан учрашди. Бу ҳақда ҳаракат расмий вакили Муҳаммад Наим хабар берди.
Станекзай Бутунжаҳон озиқ-овқат дастури директори Девид Бисли билан музокара ўтказган. У БМТдан Афғонистон учун озиқ-овқат ва инсонпарварлик ёрдами сўраган.
“Томонлар, шунингдек, мамалакат олдида турган долзарб муаммоларни муҳокама қилди, Афғонистондаги қашшоқ фуқароларига дарҳол ёрдам кўрсатиш зарурлиги қайд этилди”, — деган Муҳаммад Наим.
“Толибон” вакилининг қўшимча қилишича, ҳаракат Бислига хавфсизликни таъминлашга ваъда берган. Сиёсий офис БМТга инсонпарварлик ёрдами учун миннатдорчилик билдирган.
Эслатиб ўтамиз, бундан аввал Афғонистон жиддий гуманитар ҳалокат ёқасида тургани хабар қилинган эди.
Жаҳонгир Қўзиев
