Шаҳзода Муҳаммедованинг эри 50 минг доллар мукофоти бўлган реалити-шоуни бошлайди

 

 

Aктриса Шаҳзода Муҳаммедованинг эри, тадбиркор Марат Ҳамдамов одамларнинг орзуларини рўёбга чиқаришга ёрдам бериш учун ўзининг шахсий реалити-шоусини бошлаганини эълон қилди. Ҳамдамов ўзининг 17 ёшли фотосуратини Instagram’га қўйиб, муваффақиятга эришишининг мураккаб йўли ҳақида гапирди. Тадбиркор 19 ёшида биринчи миллион доллар топганини, лекин 26 ёшида банкрот бўлганини айтиб берган. Марат ҳозирда йиллик даромади 20-25 миллион доллар бўлган бир нечта компанияни бошқаради.

Ҳамдамов ўзбек ёшларини қўллаб-қувватлаш ва улар учун кенг кўламли лойиҳа ташкил қилмоқчи эканлигини билдирди. Реалити-шоуда 20 дан ортиқ омадли одамлар Дубайга учиш ва бизнесни бошқариш асосларини ўрганиш имкониятига эга бўлади. Томошабинлар Дубайга бориб, кузатиши мумкин. Марат фаол бўлмаган иштирокчилар дисквалификация қилинишини ҳам таъкидлади. Лойиҳада иштирок этиш бепул эмас.

Ўйин охирида энг кўп пул ишлаган гуруҳ ғолиб деб эълон қилинади. Унинг аъзолари 50 минг долларлик тайёр бизнес лойиҳасининг эгаларига айланади. Қолган барча иштирокчилар ишга жойлаштирилиши ҳақида ҳам айтиб ўтилган.

Марат Ҳамдамов кейинроқ қандай қилиб лойиҳа иштирокчиси бўлиш ҳақида батафсил маълумот беришини айтди.