«Реал» бу ёзни Мбаппесиз ўтказади
«Реал Мадрид» «ПСЖ» билан Килиан Мбаппе трансфери бўйича музокара ўткзамайдиган бўлди.
«ПСЖ» мадридликларнинг аввал 160 миллион, кейин 170+10 миллион евролик иккита таклифини рад этди. Шундан сўнг «Бланкос» хўжайинлари таклиф нархини бошқа кўтармаслик ва кутишга қарор қилди.
22 ёшли ҳужумчи «ПСЖ» билан яна бир йил қолиш ва мавсумни профессионал тарзда якунлашга келишиб олди. Шунингдек, Мбаппе кейинги музокаралардан бош тортган «Реал» раҳбариятини ҳам тўғри тушунишини айтган.
«ПСЖ», албатта, 2022 йил июнь ойида шартномаси тугайдиган Мбаппе билан янги келишув тузишдан умидвор. Лекин ҳужумчи мадридликлар сафида тўп суришни хоҳлаётгани сир эмас.
«Реал Мадрид» 2022 йил 1 январдан бошлаб французлар билан шартнома тузиш имкониятига эга бўлади.
Бундан аввал «Реал» «ПСЖ» билан Мбаппе борасида ҳали ҳам келишувга эриша олмаётгани ҳақида хабар берган эдик.
Мақсаджон Обиджонов
