Қашқадарёда "Cobalt" машинаси "Lacetti" билан тўқнашиб ағдарилиб кетди
Сўнгги йилларда йўлларда транспорт воситалари тобора кўпайиб бормоқда. Бу эса, ўз навбатида автомобиль бошқарувида ҳайдовчилардан ўта ҳушёрликни талаб этади. Баъзида ҳайдовчиларнинг ҳушёрликни унутиб, йўл қоидаларига амал қилмай йўл-транспорт ҳодисаси содир бўлишига сабаб бўлмоқда.
Ижтимоий тармоқларда Қашқадарё вилояти Нишон туманида тез ҳаракатланган "Cobalt" машинаси "Lacetti" билан тўқнашиб ағдарилиб кетгани тасвирланган видео тарқалди. ИИВ ЙҲХББ ҳодиса ҳақида маълумот берди.
Маълум қилинишича, жорий йилнинг 30 август куни соат 14:00 ларда давлат аҳамиятига эга бўлган 4Р89 Қарши-Талимаржон ГРЭС автомобиль йўлининг Нишон тумани, «Пахтакор» МФЙ ҳудудидан ўтган 18-километрида "Cobalt" ва "Lacetti" машиналари иштирокида йўл-транспорт ҳодисаси содир бўлган.
Таъкидланишича, 1993 йилда туғилган Р.Ш. бошқарувидаги "Cobalt" тез ҳаракатланиб келаётганда 1959 йилда туғилган Б.А. бошқарувидаги "Lacetti" машинаси унинг йўлига чиққан. "Cobalt" ҳайдовчиси "Lacetti" билан тўқнашмаслик учун машинани ўнг тарафга буриб юборган. Оқибатда "Cobalt" машинаси аввал "Lacetti" билан енгил тўқнашган. Сўнг йўл четига чиқиб кетган ва тўхтаб турган машиналардан бирининг тиркамасига урилиб ағдарилган.
Оқибатда "Cobalt" машинасида йўловчи сифатида кетаётган шахс тан жароҳатлари олиб шифохонага олиб кетилган.
Ҳозирда мазкур ҳодиса юзасидан Нишон тумани ИИБ ЙҲХБ ходимлари томонидан суриштирув ҳаракатлари олиб борилмоқда.
Аввалроқ Тошкентда ППХ машинаси ЙТҲ содир этгани, Қорақалпоғистонда Қозоғистон фуқароси ЙТҲга учраб, вафот этгани ҳамда Жаҳон иқтисодиёти ва дипломатия университети биноси рўпарасида мудҳиш ЙТҲ содир бўлгани хақида хабар берган эдик.
