Навоийда туғруқхонага ишга киритиб қўйиш учун фуқародан 7 млн сўм олган шифокор қўлга тушди
Юртимизда шифокорларнинг ўз касбига садоқати, халқимиз соғлиғи йўлида туну кун қилаётган меҳнати таҳсинга сазовор. Бироқ орамизда айрим қўштирноқ ичидаги шифокорлар катта пул эвазига фуқарони ишга киритиб қўяётганлар ҳам учраб турибди.
Хусусан, Навоий вилоятида катта пул эвазига фуқарони ишга киритиб қўйишни айтган шифокор қўлга олинди.
Вилоят ИИБ ахборот хизматининг хабарига кўра, 2020 йил мансабини суиистеъмол қилгани боис, вилоят Соғлиқни сақлаш бошқармаси томонидан ҳайфсан олиб, шартли равишда Кармана тумани шошилинч тез тиббий ёрдам кўрсатиш бўлимида навбатчи шифокор лавозимига туширилган 1970 йилда туғилган С.Ф. пора билан қўлга тушди.
Шифокор аввал ўзи билан бирга ишлаган ҳамшира М.Т.ни кўриб қолиб, иш ўрни тавсия қилади. Ишга жойлаштиришда ваколати бўлмаса-да янгидан ишга тушган туғруқхонага танишлари орқали ишга киритиб қўйишини айтади. Бунинг учун 7 миллион сўм пул талаб қилади. Ҳамшира ҳозирги пайтда ишсиз бўлганлиги боис мазкур пулни беришга рози бўлади.
Навоий вилояти ИИБ ЖҚБ коррупция ва иқтисодий жиноятларга қарши курашиш ходимлари томонидан ўтказилган тезкор тадбир натижасида С.Ф. 7 миллион сўм пуллар ҳамда М.Т.нинг шахсий ҳужжатларини олаётган пайтда қўлга олинди.
Айни пайтда терговга қадар текширув ҳаракатлари олиб борилмоқда.
Эслатиб ўтамиз, аввалроқ Бухорода фуқарони алдаб, уни Ғиждувон Тиббиёт коллежига ўқишга киритиш учун пора билан қўлга олингангани, Сурхондарёда талабаларни 5,4 млн сўмга чув тушириб кетган шахс ушлангани ҳамда Андижон ва Хоразм вилоятларида абитуриентларни ўқишга киритиб қўйишни ваъда қилган институт ҳисобчиси ва талаба ушлангани тўғрисида хабар берилганди.
