Асосан эмланмаган фуқаролар коронавирус қурбонига айланмоқда — АҚШ олимлари хулосаси
COVID-19'га қарши эмланмаганлар вакцина олганларга нисбатан 11 баравар кўп вафот этаётгани маълум бўлди. Бу АҚШ Касалликлар назорати ва профилактикаси маркази тадқиқотлари натижасида эълон қилинган.
Қайд этилишича, олимлар асосан вакцина олинмаган ҳолатдаги ўлим хавфини тадқиқ қилган. Тадқиқот доирасида 600 минг бемор текширувдан ўтказилган. Натижада эмланмаган фуқаролар вакцина олганларга нисбатан касалхонага 10 марта кўп ётқизилгани аниқланган. Шунингдек, эмланмаганлар касалликка 4 ярим баробар кўп чалинган.
АҚШ Касалликлар назорати ва профилактикаси маркази директори Рошель Валенски “Марказ вакцинация кўрсаткичини таъминлашга бор кучини сарфлайди”– деб айтиб ўтган.
АҚШда ҳукумат амалдорларини мажбурий эмлаш жорий қилинган. Шунингдек, Жозеф Байден коронавирусга қарши эмлаш кўламини оширишга ваъда берган. Олимлар коронавирусни енгишнинг бирдан бир йўли вакциналар эканлигини таъкидлаб келмоқда.
Эслатиб ўтамиз, бундан аввал ЖССТ вакциналарни адолатли тақсимлашга чақирган эди.
Жаҳонгир Қўзиев
