Каттақўрғон ДСИ бошлиғи ўринбосарининг ўлими бўйича жиноят иши судга оширилди
Самарқанд вилояти, Каттақўрғон тумани ИИБ ЙҲХБ ходимларининг фаолияти жараёнида туман Давлат солиқ инспекцияси бошлиғи биринчи ўринбосарининг ўлими юз берганлиги билан боғлиқ жиноят иши судга юборилди. Бу ҳақда Бош прокуратура Матбуот котиби маълум қилди.
Аниқланишича, жорий йилнинг 10 июнь куни тунги соат 00:50 ларда Давлат солиқ инспекцияси бошлиғининг биринчи ўринбосари А.А. “Cobalt” русумли автотранспортда светофорнинг қизил чироғидан тўхтамай, ходимларнинг тўхташ ишорасига бўйсунмасдан, автотранспортда юқори тезликда ҳаракатланиб яширинмоқчи бўлган.
Ҳудуддаги 4R-243 автомобиль йўлининг 7 километрига етганида “Cobalt” йўл қатнов қисмининг ўртасида тўхтаб, ҳайдовчи автотранспортни ташлаб, пиёда қочишга уринган.
Ҳуқуқбузар ходимлар томонидан ушланиб, ўта маст ҳолатда бўлганлиги гумон қилиниб, тиббий кўрикдан ўтиш учун таклиф қилинганида Давлат солиқ инспекцияси бошлиғи биринчи ўринбосари А.А. ички ишлар органлари ходимларининг қонуний талабларини бажармасдан фаол қаршилик кўрсата бошлаган.
Шу вақт оралиғида тиббий кўрикка олиб бориш учун транспорт воситасига ўтказилган фуқаро А.А.нинг соғлиғи ёмонлашгани боис воқеа жойига тез тиббий ёрдам хизмати чақиртирилган. Кўрсатилган муолажаларга қарамай фуқаро А.А. воқеа жойида вафот этади.
Каттақўрғон тумани ИИБ ЙҲХБ ходимларининг фаолияти жараёнида туман Давлат солиқ инспекцияси бошлиғи биринчи ўринбосарининг ўлими юз берган. Ҳолат юзасидан ЖКнинг 206-моддаси билан жиноят иши қўзғатилган.
Баҳринисо Мадумарова
