"Толибон" Кобулда шаҳар хўжалигида ишлайдиган аёлларнинг бўшашини талаб қилди

 

 Кобул шаҳри ҳокими вазифасини башарувчи Мавлавий Ҳамидулла Нўмоний эркаклар ишлаши  мумкин бўлган лавозимларни эгаллаб турган аёлларнинг ишдан бўшашини талаб қилган. Унинг сўзларига кўра, ҳозирда шаҳар хўжалигида 2.9 минг киши меҳнат қилмоқда, шундан 27 фоизини аёллар ташкил этади. Улар асосан  маъмурий, қурилиш ва муҳандислик соҳаларида фаолият олиб бормоқда.

 

"Биз эркаклар ишлолмайдиган ёки фақат аёллар иши бўлган соҳаларга хотин-қизларнинг қайтишига имкон бердик. Улар ҳар куни ишга қатнамоқда. Масалан, аёллар ҳожатхонасида ишлайдиганларни эркаклар билан алмаштириб бўлмайди", деган Нўмоний.

 

Шунингдек, шаҳар марказидаги айрим аёлларни ҳам эркаклар билан алмаштириб бўлмаслиги таъкидланди. Гап электронергетика ва қурилишда ишлайдиган аёллар ҳақида кетмоқда. "Лекин эркаклар ҳам ишласа бўладиган лавозимни эгаллаб турган аёлларга вазият ўнглангунга қадар  уйда бўлиб туришни айтдик. Уларнинг маоши тўлиқ тўланади", деб қўшимча қилган Кобул шаҳри раҳбари.

 

Маълумот ўрнида: 15 август куни “Толибон” ҳаракати Кобулни эгаллаган. 31 августда АҚШ Афғонистонни тўлиқ тарк этди. Ҳаракат томонидан эгалланмаган ягона вилоят Панжшер эди. Аммо 6 сентябрда ушбу ҳудуд ҳам “Толибон” назоратига ўтди. Шундан кейин 7 сентябрь куни мамлакатнинг янги ҳукумати тузилгани эълон қилинди.

 

Эслатиб ўтамиз, бундан аввал толиблар расмий вакили Забиҳулло Мужоҳид ҳаракат аёллар таълимига қарши эмаслигини маълум қилганди.

 

 

Жаҳонгир Қўзиев