Ўзбекистон-Филиппин муносабатларининг ҳозирги ҳолати ва ривожланиш истиқболлари муҳокама қилинди
Жорий йилнинг 20 сентябр куни видеоконференсалоқа шаклида Ўзбекистон Республикаси ва Филиппин Республикаси ташқи ишлар вазирликлари ўртасида сиёсий маслаҳатлашувларнинг иккинчи давраси бўлиб ўтди.
Вазирлик матбуот хизматининг хабар қилишича, делегацияларга Ўзбекистон Ташқи ишлар вазири ўринбосари Фурқат Сидиқов ва Филиппин Ташқи ишлар вазирининг ўринбосари Тереза Лазаро бошчилик қилишди.
Қайд этилишича, музокаралар чоғида Ўзбекистон-Филиппин муносабатларининг ҳозирги ҳолати ва ривожланиш истиқболлари муҳокама қилинди.
Мунтазам сиёсий мулоқот ва маданий ҳамкорликни кенгайтиришга икки томон ҳам тайёр эканлиги билдирилди.
Таъкидланишича, савдо-иқтисодий ва сармоявий ҳамкорликнинг истиқболли йўналишлари ҳам муҳокама этилган бўлиб, Филиппин томони қишлоқ хўжалиги, фармацевтика ва туризм соҳаларидаги алоқаларни мустаҳкамлашга қизиқиш билдирди.
Томонларнинг халқаро ташкилотлар доирасидаги ўзаро ҳамкорлиги ва айрим минтақавий муаммолар юзасидан фикр алмашилди, дейилади хабарда.
