Бугун Тошкент метрополитенида яна бир носозлик рўй берди
Сўнгги вақтларда ижтимоий тармоқларда метрополитен фаолияти билан боғлиқ турли ҳолатлар акс этган видеотасвирлар кенг тарқалмоқда. Тўғри, техноген авария ва турли носозликларнинг транспорт соҳасида учраб туриши табиий ҳол. Лекин бундай ҳолатларнинг тез-тез содир бўлаётгани йўловчиларни саросимага солаётгани сир эмас.
Ижтимоий тармоқларда метрода бугун ҳам эрталабки тирбандлик вақтида "Халқлар дўстлиги" бекатида эшиклар ёпилмай қолгани ҳақида хабарлар тарқалди. Ушбу ҳолатга ойдинлик киритиш мақсадида “Zamon.uz” сайти “Тошкент метрополитени” УКнинг Жамоатчилик билан алоқалар бўлими ходими Илҳомжон Қосимов билан боғланди.
Унинг маълум қилишича, воқеа эрталаб соат 08:37 да содир бўлган. 13-йўналишдаги ҳаракат таркибининг 2-вагони 4 та эшиги техник носозлик туфайли ёпилмай қолган. Ҳаракат хавфсизлигини таъминлаш мақсадида йўловчилар туширилган. Юзага келган тирбандликнинг олдини олиш учун ортдан келаётган 5- йўналишдаги ҳаракат таркиби 1 дақиқа ичида етиб келиб йўловчиларни олиб кетган.
"Бундай ноқулайлик учун йўловчилардан узр сўраймиз" — дейди “Тошкент метрополитени” УК ўз хабарида.
Эслатиб ўтамиз, бундан аввал 20 сентябрь куни соат 09:10 да Тошкент метросининг “Ғофур Ғулом” бекатидан “Чорсу” бекатига ҳаракатланиши лозим бўлган 41-йўналишдаги ҳаракат таркибида ҳаво тақсимлаш тизимида техник носозлик юзага келгани ҳақида хабар берган эдик.
Муножат Валиева
