71-Канн халқаро кинофестивали номинацияси ғолибаси Тошкент халқаро кинофестивалида иштирок этади
Тахминларга кўра, бу йил Тошкентнинг "Ипак йўли гавҳари" халқаро кинофестивалига дунёнинг 37 мамлакатидан таниқли хорижлик актёр ва актрисалар ташриф буюриши кутилмоқда.
Улар орасида қозоғистонлик киноижодкорлар ҳам бор. Бу икки қардош халқнинг санъати, маданияти ва урф-одатлари бир-бирига азалдан жуда яқин. Жумладан, "Аҳмад Яссавий" ҳужжатли фильмида буни яққол кўриш мумкин. Мазкур фильм ўзбек ва қозоқ киноижодкорлари билан биргаликда суратга олинган.
Кинофестивалга Қозоғистон Республикаси халқ артисти Нуржуман Ихтимбоев, таниқли актриса А.Жазилбекова ҳамда 71-Канн халқаро кинофестивалининг "Энг яхши актриса" номинацияси ғолибаси С.Эслямова келиши кутилмоқда.
Фестивалда қозоғистонлик режиссёрларнинг "Музбалак", "Култегин", "Амре", "Сен учун", "Омонат", шунингдек, Акан Сатаевнинг "Оналик йўли" фильмлари намойиш этилади. Бундан ташқари, "Жаҳон кино кунлари" доирасида Асел Ирис ёш киноижодкорлар учун "Кино таълими" маҳорат дарсини ўтказади.
Эслатиб ўтамиз, аввалроқ Турк киноси ҳам кинофестивалида фаол намойиш этилиши, кинофестиваль ғолибларига топшириладиган номинациялар очиқлангани ҳамда унда машҳур режиссёр иштирок этиши кутилаётгани ҳақида хабар берилганди.
Оламгир Абдиев
