Панжшер қаршилик кучлари Қори Фасиҳуддинга қарши "ов" бошлади
"Спутник Афганистан"нинг маълумотларига кўра, Панжшер кучлари толибларнинг олий ҳарбий раҳбарларидан бирига қарши суиқасд уюштирган. Афғонистон қуролли кучлари бош штаби бошлиғи бўлган Қори Фасиҳуддин Саланг довонида панжшерликларнинг пистирмасига дуч келган.
Қори Фасиҳуддин аввалроқ Бадахшон вилоятига, қўшинлар жанговар тайёргарлигини текшириш учун борган эди. Бадахшондан қайтишда эса Афғонистон миллий қаршилик фронти (Панжшер қаршилик кучларининг расмий номи)нинг пистирмасига учраган. Аммо Фасиҳуддиннинг ўзига шикаст етмаган.
Шу билан бирга унга ҳамроҳлик қилганлардан бири ҳалок бўлган. Шунингдек, бош штаб бошлиғига яқин шахслардан бири оғир яраланган.
Аҳмад Масъуд тарафдорларининг маълум қилишича, бу ҳали бошланиши. Қаршилик кучлари "Толибон" раҳбариятидаги айримларни йўқ қилмоқчи.
"Спутник Афганистан" панжшерликларнинг Қори Фасиҳуддинга нисбатан шахсий адовати борлигини тахмин қилди. Сабаби, Фасиҳуддин бадахшонлик тожик бўлиб, Панжшер водийси эгалланиши операциясига раҳбарлик қилган.
Бундан аввал Аҳмад Масъуд Кембриждаги халқаро конференцияга мурожаат йўллагани хабар қилинганди. Шунингдек, толиблар афғонистонлик имомларни қийноққа солаётгани маълум бўлганди.
Жаҳонгир Қўзиев
