Тошкент халқаро кинофестивалида кимлар иштирок этиши очиқланди
Бугун “Ипак йўли дурдонаси” ХIII халқаро Тошкент кинофестивали олдидан Кинематография агентлигида матбуот анжумани бўлиб ўтди. Унда фестивалда иштирок этадиган давлатлар, бўлиб ўтадиган тадбирлар, таниқли юлдузлар, жаҳон киноси кунлари дастури ҳақида батафсил маълумот бериб борилди.
Шунингдек, дастлаб тадбирга ташриф буюрган фахрий меҳмонларнинг табрик сўзлари тингланди. Анжуман давомида 14 та давлатда суратга олинган энг сара кинофильмларнинг қисқача видеоролиги намойиш этилди.
Шу билан бирга, кинофестивалга ташриф буюрадиган киножодкорлар анжуман қатнашчиларига таништирилди. Жумладан, Люк Бессон, Стивен Сигал, Франко Неро, Жерар Депардье, Никита Михалков, Митхун Чакраборти ҳамда Игор Жижикин, Туркия киноактёрлари — Ўзжан Дениз, Сердар Ўртач, Сефа Зингин, Октай Кайнарса, Назал Кесал, Мелиса Памук, Фелиз Аҳмет, Эркан Колсак, Санер Синдорук кабиларнинг ташрифи кутилмоқда. Қолаверса, кинофестивал доирасида тадбир иштирокчилари нафақат Тошкентга, балки бир қатор бошқа вилоятларга ижодий сафарлар ҳам режалаштирилган. Бундан ташқари, 1 октябрда Герасимов номидаги Бутунроссия Кинематография институтининг Тошкент филиали очилиш маросими бўлиб ўтиши ҳақида эълон қилинди.
Эслатиб ўтамиз, Тошкент халқаро кинофестивалиниг очилиш маросими 28 сентябрь куни янги ташкил топган Киночилар уйида бўлиб ўтади.
Аввалроқ, Тошкент халқаро кинофестивалида машҳур режиссёр иштирок этиши кутилаётгани, кинофетивал меҳмонларни кутаётгани хабар қилинганди. Шунингдек, ҳинд кино юлдузлари Тошкент халқаро фестивалида қатнашиши ҳақида айтилганди.
Чўлпоной Аҳмедова
