АҚШ ва Россия генераллари Россиянинг Марказий Осиёдаги базаларидан фойдаланиш масаласини муҳокама қилди
АҚШ қуролли кучлари штаб бошлиқлари бирлашган қўмитаси бошлиғи Марк Милли ўтган ҳафта россиялик ҳамкасби Валерий Герасимов билан Россиянинг Марказий Осиёдаги базаларидан фойдаланиш масаласини кўтарган. Бу ҳақда “The Wall Street Journal” хабар бермоқда.
Герасимов ва Милли ўтган ҳафтада Хельсинкида учрашганди. Ушбу тадбир давомида, шунингдек, ҳарбий фаолият доирасида турли ҳодисалар содир бўлиши масаласи муҳокама қилинган.
Герасимов АҚШ генералига ҳеч қандай ваъда бермаган. Юқоридаги масаланинг кўтарилишига Жо Байден админстрациясининг Афғонистонни кузатиб туриш ва мамлакатдан келадиган террор хавфини олдини олишга қаратилган янги имкониятларни излаётгани сабаб бўлган.
Бундан аввал ОАВ Путин ва Байденнинг Женевадаги учрашувида Россиянинг Марказий Осиёдаги базаларидан фойдаланиш масаласи кўтарилиши мумкинлигини айтганди. Аммо “The Wall Street Journal”нинг маълумотларига кўра, Путин ўшанда қўшни мамлакатларга АҚШ қўшинларининг жойлаштирилишига қарши чиққан. Россия Америка ҳарбий базаларининг Марказий Осиёда бўлишини ўзи ва минтақа хавфсизлигига таҳдид, деб билади.
Эслатиб ўтамиз, Вашингтон ўтмишда минтақада ҳарбий базаларга эга бўлган. Аммо 2005 йилда улар Ўзбекистонни, 2014 йилда Қирғизистонни тарк этган.
Аввалроқ "Толибон" Афғонистондаги ИШИД жангари тўғрисида хабар берганди. Шунингдек, ҳаракат Россияни наркотрафикка қарши курашда ҳамкорликка чақирганди.
Жаҳонгир Қўзиев
