Қарздорнинг “Trailblazer” автомашинаси хатланди
Бухоро вилоят ҳокимлиги матбуот хизматининг хабар беришича, Фуқаролик ишлари бўйича Бухоро вилояти Ғиждувон туманлараро суди 2021 йил 9 сентябрдаги ижро ҳужжатига асосан қарздор Ҳ.С.дан Шофиркон туман Давлат солиқ инспекцияси фойдасига 650,2 миллион сўм солиқ қарздорлиги ва 26 миллион сўм давлат божини ундириш тўғрисида қарор қабул қилган. Ижро ҳужжатлари бюронинг Шофиркон туман бўлими иш юритувига келиб тушган.
Лекин қарздор огоҳлантирилган бўлишига қарамай қарзини тўламай юрган. Шундан сўнг давлат ижрочиси қарздор номида “Trailblazer” русумли автомашина борлигини аниқлаб, унга нисбатан қидирув эълон қилди.
Қидирув тадбирлари натижасида “Trailblazer” автомашинаси топилиб, хатланди ва жарима майдончасига олиб келинди. Ҳозирда автомашинани баҳолаб, “E-ijro auksion” электрон савдо майдончаси орқали савдога чиқариш чоралари кўрилмоқда.
Бундан аввал тадбиркорларнинг солиқ ҳисоботини муддатида тақдим этмагани учун молиявий санкциялар қўллаш бекор қилиниши, давлатимиз раҳбарини хавотирга солаётган солиқ идоралари қўллаётган айрим жарималари ҳамда МИБ томонидан 742 минг 476 та ижро ҳужжати муддати бузилган ҳолда ижро этилгани ҳақида хабар берилганди.
Оламгир Абдиев
