Бухорода қарздорларнинг машинаси хатланди
Бухорода бир кунда қидирувда бўлган 12 та автомашина топилди. Бу ҳақда Бухоро вилоят ҳокимлиги матбуот хизмати хабар берди.
Унда айтилишича, айрим шахслар кредит тўловлари ва қарзларини ўз вақтида тўламаган. Тўловни ундириш учун Мажбурий ижро бюросига ундириш буйруқлари келиб тушган. Давлат ижрочилари томонидан қарздор шахсларга тегишли автомашиналар аниқланган ва қидирувга берилган. Автоуловлар бир кунда топилган.
Шунингдек, айрим ташкилот ва масъулиятли жамиятлар давлат божини тўламагани сабабли вилоятдаги туманлараро судларнинг ижро ҳужжатларига асосан уларга тегишли бўлган автомобиллар аниқланган ва қидирувга берилган. Улар ҳам бир кун ичида топилган.
Қидирув натижасида топилган автомашиналар жарима майдончасига жойлаштирилди. Улар асосан “Cobalt”, “Captiva”, “Malibu”, “Nexia”, “Lacetti” русумли енгил ҳамда “LW300KN” ва “HОWО” русумли юк автомашиналаридир.
Ҳозирда автомобилларнинг нархи баҳоланиб, “E-ijro auksion” электрон савдо майдончаси орқали савдога чиқарилмоқда. Сотувдан тушган пуллар эса қарздорликни қоплашга қаратилади.
Аввалроқ қарздорнинг “Trailblazer” автомашинаси хатланганди. Шунингдек, МИБ томонидан 742 минг 476 та ижро ҳужжатининг муддати бузилган ҳолда ижро этилгани ҳақида хабар берилганди.
Оламгир Абдиев
