Маълум бўлишича, 18 сентябрь куни соат 01:00 ларда номаълум шахс "Авиасозлар" даҳасидаги банкоматлардан бирини бузиб, ундаги пулларни ўғирлаб кетган.

 

Ҳуқуқ-тартибот органлари ходимлари ушбу шахсни эртаси куни ушлашга муваффақ бўлган. Аниқланишича, қўлга олинган шахс бунга қадар бир неча бор судланган. Унинг уйида ўтказилган тинтувлар давомида 73 миллион сўм топилган. Қолган пулларни у ўз эҳтиёжлари учун ишлатиб юборган.

 

"Кечқурун ичдим ва кўчага чиқдим. Банкомат кўрдим, унда пул борлигини билардим. Машинамда иккита пичоқ бор эди, очадимикан ёки йўқ дея пичоқни тиқдим. Очилди, иккита ‘ячейка’ турган экан, олиб кетдим…", — дейди гумонланувчи.

 

Ҳолат юзасидан Яшнобод тумани ИИО ФМБ ҳузуридаги Тергов бўлими томонидан Жиноят кодексининг 169-моддаси (ўғирлик) билан жиноят иши қўзғатилган ва айбланувчига нисбатан "қамоққа олиш" эҳтиёт чораси қўлланилган.

 

Аввалроқ Қашқадарё вилоятининг Шаҳрисабз туманида банкоматлар нега ишламаётгани, Навоийда ака-ука товламачилик қилиб, Жанубий Кореяга юбориш учун икки дўстидан 3 000 доллардан пул ундиргани ҳамда Жиззахда фирибгар ўз дўстининг 3 500 АҚШ долларини ўмаргани ҳақида хабар берилганди.