Хитой Ҳиндистон билан чегарага катта қўшин тўплаяпти — Ҳиндистон ТИВ
Ҳиндистон ташқи ишлар вазирлигининг маълум қилишича, Хитой чегарада катта миқдорда ҳарбий куч тўплаяпти. Бу ҳақда “ТАСС” хабар берди.
Вазирлик расмий вакили Ариндам Багчи икки мамлакат ўртасидаги низоли ҳудуд – Ладакхда Хитой қўшинлари тўпланаётганини айтган. Унинг қўшимча қилишича, Ҳиндистон бунга нисбатан жавоб чораларини кўришга мажбур.
“Хитой чегара туманларига катта миқдорда қўшин ва қурол-яроғларни жойлаштиришда давом этмоқда. Шунинг учун миллий манфаатлар ва хавфсизликни таъминлаш мақсадида Ҳиндистон қуролли кучлари жавоб чораларини кўришга мажбур бўлди”, – деган Багчи.
Мансабдор икки давлат чегарасидаги тарангликка Пекин жавобгар эканини таъкидлаган. Багчи Хитойнинг хатти-ҳаракатлари икки томонлама тузилган барча шартнома ва келишувларнинг бузилишига олиб келганини қайд этган.
Маълумот ўрнида: 2020 йил ёзида Хитой ва Ҳиндистон ўртасидаги азалий чегара низоси қайта авж олди. Бунинг оқибатида ҳар икки давлат чегарага катта миқдорда куч ташлаган. Пекин ва Деҳли Аксайчин ҳамда Ладакх ҳудудларига даъво қилиб келади.
Бундан аввал Хитой мудофаа вазирлиги қуролланиш пойгаси авж олиши ҳақида огоҳлантирганди. Шунингдек, Вашингтонда “Осиё НАТОси” учрашуви ташкил этилгани хабар қилинганди.
Жаҳонгир Қўзиев
