Наманганда банкомат 10 минг сўм ўрнига 50 минг сўмлик купюра чиқараётгани бўйича изоҳ берилди
Ижтимоий тармоқларда Намангандаги банкоматлардан бири пластик картадан 10 минг сўм ечиб олиб, 50 минг сўмлик купюра чиқаргани тасвирланган видео тарқалди. Мазкур ҳолат бўйича "Ҳамкорбанк" АТБ маълумот берди.
Қайд этилишича, ушбу ҳолат 27 сентябрь куни банкнинг Наманган минтақавий филиалига тегишли 24/7 режимида ўз‑ўзига хизмат кўрсатувчи офисда жойлашган банкоматда содир бўлган.
Видео муаллифининг айтишича, банкомат пластик картадан 50 минг сўм ечиб олиб, 10 минг сўмлик купюра чиқариб берган. Шунингдек, қурилма 10 минг сўм ечиб олиб, ўрнига 50 минглик купюра чиқаргани намойиш этилган.
Мазкур хатолик банкоматдаги 10 минг сўмлик ва 50 минг сўмлик пул сотиш кассеталари алмашиб қолгани натижасида юзага келган. Ҳолат тезкорлик билан ўша куннинг ўзида хатолик аниқлангандан сўнг, 30 дақиқа ичида бартараф этилган.
