Тошкентда юз берган ЙТҲда 10-синф ўқувчиси вафот этди
Тошкентда 20 ёшли ҳайдовчи “Damas”да 4 нафар мактаб ўқувчисини уриб юборди. Улардан бири шифохонага олиб кетилаётганда вафот этди. Бу ҳақда пойтахт ИИББ матбуот хизмати хабар берди.
Маълум қилинишича, воқеа 2 октябрь куни, тахминан, соат 15:00 да Янгиҳаёт туманидаги Чинор ва Полвонёр кўчалари кесишмасида юз берган. 20 ёшли А.К. “Damas”ни ишончнома асосида ҳайдаб кетаётганида бошқарувни йўқотиб, йўл четида турган вояга етмаган пиёдаларни уриб юбориб, “Nexia” билан тўқнашган.
Бахтсиз ҳодиса оқибатда 10-синф ўқувчилари — 2005 йилда туғилган Глеб К., 2005 йилда туғилган Сармат М. ва 2006 йилда туғилган Темур Х. бадан шикастлари билан шифохонага етказилган. Иккала автомобиль ҳайдовчилари ҳам шифохонага етказилган.
Таъкидланишича, яна бир пиёда — 10-синф ўқувчиси 2004 йилда туғилган Артём Й. ЙТҲ оқибатида етган бадан шикастлари туфайли шифохонага етказиш давомида вафот этган.
Ҳолат юзасидан Тошкент шаҳар ИИББ Тергов бошқармаси томонидан Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш одам ўлимига сабаб бўлиши) бўйича жиноят иши қўзғатилган. Ҳозирда воқеа юзасидан тергов ҳаракатлари олиб борилмоқда.
Аввалроқ Қумқўрғон туманида 5 ёшли қизча автоҳалокат сабаб вафот этгани, Наманганда 3-синф ўқувчиси ЙТҲ оқибатида шифохонада вафот этгани ҳамда Тошкент вилоятида “Jiguli” ҳайдовчиси 2-синф ўқувчисини уриб юбориб, воқеа жойидан қочиб кетган ҳайдовчи ҳақида хабар берилганди.
Чўлпоной Аҳмедова
