Наманганда 3-синф ўқувчиси ЙТҲ оқибатида шифохонада вафот этди
Наманган шаҳрида «ВАЗ-2101» йўлнинг белгиланмаган жойидан кесиб ўтаётган мактаб ўқувчисини уриб кетди. Бу ҳақда ЙҲХББ хабар берди.
Қайд этилишича, 13 сентябрь куни соат 18:40 атрофида «Келажак тонгги» маҳалласи Чортоқ кўчасида «ВАЗ-2101» машинасини ҳушёр ҳолда бошқариб кетаётган ҳайдовчи ҳаракат хавфсизлигини таъминлай олмаган.
Оқибатда у йўлнинг белгиланмаган жойидан кесиб ўтаётган, 63-сонли мактабнинг 3-синф ўқувчисини уриб юборган.
Маъулм қилинишича, пиёда кўрсатилган тиббий ёрдамларга қарамай бош мия чайқалиши, бош мия ёпиқ синиши ва ўнг оёқ болдир суягининг ёпиқ синиши ташхиси билан туман шифохонасида вафот этган.
Ҳозирда ҳолат юзасидан суруштирув ишлари олиб борилмоқда.
Барча ота-оналардан вояга етмаган фарзандларига эътиборли бўлишларини, ҳайдовчилардан эса йўлларда болаларга ўта эҳтиёткор бўлишларини сўраймиз, дейилади хабарда.
Бундан аввалроқ Зоминда «ВАЗ-2107» ва "Tracker" автомобили тўқнаши натижасида 7-синф ўқувчиси олган тан жароҳати сабаб туман марказий шифохонасига ётқизилгани ҳамда Сурхондарё вилояти Сариосиё туманида «Маtiz» машинаси ҳайдовчиси 12 ёшли қизни уриб юбориши оқибатида вафот этгани ҳақида хабар берилганди.
