Энди маҳсулот сотиб олган харидорга харид суммасининг 1 фоизи қайтарилади

 

 

Унда айтилишича, 2022 йилда бошлаб чакана савдо, умумий овқатланиш ва аҳолига маиший хизмат кўрсатиш объектларида харидни амалга ошириб, харид чекини мобил иловада рўйхатдан ўтказган жисмоний шахсларга ой якуни билан харид суммасининг 1 фоизи қайтарилади. Бунда олинган чекдаги QR-код мобил илова орқали сканерланади.

 

Бироқ бу тартиб автомобиль, темир йўл ва авиачипта сотиб олинганда, коммуналь ҳамда алоқа хизмати, шунингдек, тўлов тизими операторлари орқали тўлов амалга оширилганда амал қилмайди

 

Харидорга чек ёки уларга тенглаштирилган ҳужжатларни бермасдан товар сотганлик ёхуд хизматлар кўрсатганлик ҳақида хабар берган шахслар рағбатлантирилади. Яъни қалбаки маркировка қўлланилган ёки маркировка мавжуд эмаслиги тўғрисида солиқ органларига махсус дастур орқали хабар берган жисмоний шахсларга ундирилган жариманинг 20 фоизи миқдорида мукофот тўланади.

 

Тўлов тизимлари операторлари ўз тўлов тизимларини онлайн назорат-касса машиналарига мажбурий равишда улаш ва шу орқали солиқ органларининг ахборот тизимларига интеграциялашни таъминлаш талаби ўрнатилади.

 

Шунингдек, 2022 йил 1 январдан маҳсулотлар (товарлар ва хизматлар) ягона электрон миллий каталоги идентификациялаш кодлари акс эттирилмайдиган онлайн назорат-касса машинаси ва виртуал касса чекларини тақдим этиш тақиқланади.

 

2023 йил 1 январгача тадбиркорлик субъектларига онлайн назорат-касса машинаси ҳамда махсус қурилмаларнинг ҳар бирини сотиб олиш билан боғлиқ харажат, шунингдек, ҳисобланган ва тўланиши лозим бўлган фойда солиғи, айланмадан олинадиган солиқ ёҳуд якка тартибдаги тадбиркорлар томонидан тўланадиган жисмоний шахслардан олинадиган даромад солиғи суммаларини камайтириш ҳуқуқи берилди.

 

Эслатма: сотиб олинадиган онлайн назорат-касса машинаси ҳамда махсус қурилманинг ҳар биттаси БҲМнинг 4 бараваридан кўп бўлмаган сумма миқдорида бўлиши лозим.

 

Аввалроқ 1 октябрдан қонунчиликда нималар ўзгаргани ҳамда 25 ёшдан ошмаган ходимлар учун ижтимоий солиқ суммаси давлат бюджетидан қопланиши ҳақида хабар берилганди. 

 

Оламгир Абдиев