Facebook, WhatsApp ва Instagram'нинг бир соат ишламаслиги жаҳон иқтисодиётига 161 миллион доллар зарар етказди
4 октябрь куни бутун дунёда интернетда узилишлар кузатилди. Дастлаб Facebook, WhatsApp ва Instagram'да бошланган муаммо кейинчалик Google хизматлари, Twitter, Tiktok ва Zoomга ҳам таъсир қилди. Ҳатто Россияда Вконтакте ва Telegramда ҳам узилишлар бўлгани маълум қилинди.
Facebook, WhatsApp ва Instagram'нинг бир соат ишламаслиги жаҳон иқтисодиётига 161 миллион доллар зарар етказди. Умуман олганда Facebook акциялари 5 фоизга пасайди. Оқибатда, “Риа Новости” маълумотларига кўра, компания асосчиси Марк Цукерберг 6 миллиард доллардан ортиқ бойлигини йўқотди. Кейинроқ Цукерберг тармоқдаги носозликлар учун фойдаланувчилардан узр сўради.
Шунингдек, тармоқда 1.5 миллиард Facebook фойдаланувчиларининг маълумотлари сотиб юборилгани тўғрисида хабарлар тарқалди. Компаниянинг ўзи буни инкор қилмоқда. Аммо юқоридаги хабарларнинг ўзиёқ ижтимоий тармоққа бўлган ишончнинг пасайишига сабаб бўлди.
Facebook узилишларни техник сабаблар билан боғлаган. Компания муҳандислари муаммо магистраль маршрутизаторлардаги ўзгаришлар туфайли вужудга келганини маълум қилди. Ушбу узилиш ижтимоий тармоқ тарихидаги энг узун узилиш сифатида қолди. Эътиборлиси , техник муаммоларни бартараф этиш бунчалик чўзилиб кетганига сабаб, муаммо чиққандан сўнг, компания ходимлари офисларига кира олмай қолган. Чунки офисга кириш тўлиқ электронлаштирилган ва махсус бейджик орқали бўлган. Аммо серверлардаги муаммо туфайли офисга киришдаги электрон ҳимоя тизими ҳам ишламаган, яъни ходимларнинг бейджикларини “танимаган”.
Аввалроқ Буюк Британия мудофаа вазири киберҳужумлар ҳақида гапирганди.
Жаҳонгир Қўзиев
