Шавкат Мирзиёев афғон халқига зарур инсонпарварлик ёрдамини кўрсатишни давом эттиришга тайёрлигини айтди
Маълумки, Шавкат Мирзиёев 5 октябрь куни Туркманистон президенти Гурбангули Бердимуҳамедов иштирокида расмий учрашув бўлиб ўтмоқда. Музокараларда Афғонистон халқига зарур инсонпарварлик ёрдамини кўрсатишни давом эттиришга тайёрлигини айтди.
Бу ҳақда Президент матбуот хизмати маълум қилди.
“Афғон халқига зарур инсонпарварлик ёрдамини кўрсатишни давом эттиришга, ушбу мамлакатда муҳим ижтимоий-иқтисодий ва инфратузилмавий лойиҳаларни амалга оширишда туркманистонлик шериклар билан фаол ҳамкорлик қилишга тайёрмиз”, — деди Президент Шавкат Мирзиёев.
Учрашувда Афғонистонда тинчлик ва барқарорлик бутун Марказий Осиё минтақасида тараққиёт гарови экани таъкидланган.
Шунингдек, президентлар халқаро майдонда, шу жумладан, БМТ, МДҲ, Европада хавфсизлик ва ҳамкорлик ташкилоти, Иқтисодий ҳамкорлик ташкилоти, Ислом ҳамкорлик ташкилоти, Туркий тилли давлатлар ҳамкорлиги ташкилоти ва бошқа халқаро тузилмалар доирасида яқин мулоқотни давом эттириш ҳамда ташаббусларни биргаликда илгари суришга ҳам келишиб олди.
Аввалроқ Шавкат Мирзиёев ва Гурбангули Бердимуҳамедовнинг тор доирадаги музокаралари бошлангани ва учрашув давомида 23 та ҳужжат имзолангани ҳақида хабар берилганди.
Чўлпоной Аҳмедова
