Саакашвили Грузияда пароканда эмас, балки яхши ташкил этилган давлат тузумига дуч келди — Ираклий Гарибашвили
Михаил Саакашвилининг руҳий ҳолати қамоққа олингандан кейин жиддий ўзгарган. Бу ҳақда Грузия бош вазири Ираклий Гарибашвили маълум қилди.
“Саакашвилининг психологик ҳолати қамоққа олингандан кейин жиддий ўзгаришга учради. “Миллий ҳаракат” (Саакашвили асос солган партия) ўз етакчисининг оғир аҳволидан хавотирда ҳамда унинг зудлик билан озод қилинишини талаб қилмоқда”, – деган Гарибашвили.
Унинг қўшимча қилишича, собиқ президент Грузияда пароканда эмас, балки яхши ташкил этилган давлат тузумига дуч келган.
“Энди у фақат қай тарзда озод бўлишини ўйлаши керак”, – деб айтган бош вазир.
Маълумот ўрнида: Саакашвили 1 октябрь куни қамоққа олинган. У Грузияга 8 йиллик танаффусдан сўнг қайтиб келди. Собиқ президент 2004-2013 йилларда мамлакатни бошқарган. Шундан кейин у Украина фуқаролигини қабул қилган ва бир қанча лавозимларда ишлаган.
Бундан аввал Европа Иттифоқи Грузияни Саакашвили масаласида вазмин бўлишга чақиргани ҳамда собиқ президентнинг қамоқхонадан мактуб ёзгани хабар қилинганди.
Жаҳонгир Қўзиев
