Европа Иттифоқи Грузияни Саакашвили масаласида босиқликка чақирди
Европа Иттифоқи Михаил Саакашвилини қамоққа олиниши сабабли Грузия ҳукуматини вазминликка чақирмоқда. Бу ҳақда Иттифоқ ташқи сиёсий хизмати расмий вакили Набиля Массрали маълум қилди.
“Грузия собиқ президенти Михаил Саакашвилининг ватанига қайтиши ва шундан кейин қамоққа олиниши туфайли Европа Иттифоқи грузин ҳукумати ва мухолифатини вазминликка ва қонунларга риоя қилишга чақиради. Фундаментал ҳуқуқларни ҳурмат қилиш ва зарур ҳуқуқий жараёнларга амал қилиш ўта муҳим”, – деган Массрали.
ЕИ расмий вакили барча томонлар мавжуд низонинг кескинлашмаслигида тенг жавобгар эканини таъкидлади.
Маълумот ўрнида: Саакашвили 1 октябрь куни қамоққа олинган. У Грузияга 8 йиллик танаффусдан сўнг қайтиб келди. Собиқ президент 2004-2013 йилларда мамлакатни бошқарган. Шундан кейин у Украина фуқаролигини қабул қилган ва бир қанча лавозимларда ишлаган.
Бундан аввал Саакашвили очлик эълон қилгани ҳамда Грузияга нима учун қайтгани хабар қилинганди.
Жаҳонгир Қўзиев
