Чўлпон ҳақидаги ҳужжатли фильмнинг премьераси бўлиб ўтди
Алишер Навоий номидаги киносаройда Кинематография агентлиги буюртмасига биноан ҳамда Ички ишлар вазирлиги академияси ҳамкорлигида “Media Illusion” студияси томонидан суратга олинган Чўлпон ҳаёти ва ижоди ҳақидаги "Қуш эсдалиги” ҳужжатли фильми премьера қилинди.
Кинематография агентлиги ахборот хизмати хабар қилишича, аввал саҳнада талабалар иштирокида саҳна кўринишлари кўрсатилди ва Чўлпон ҳаётига оид маърузалар тингланди.
Қайд этилишича, кинокартина Президент Шавкат Мирзиёевнинг 2020 йил 20 май куни Тошкент шаҳрида ташкил этилган Адиблар хиёбонига ташрифи давомида берилган топшириқлари асосида яратилган.
Маълумот учун, сценарий муаллифи Эркин Бозоров, режиссёр ва продюсер Ҳусан Рашидов, оператор Рустам Муродов, рассом Шуҳрат Абдумаликов, картина директори Музаффар Ўрозқулов.
Кинематография агентлиги буюртмасига биноан суратга олинган 24 та адиб ҳақидаги “Халқ юраги” туркум остидаги ҳужжатли фильмларнинг барчаси “Ипак йўли дурдонаси” XIII Тошкент халқаро кинофестивали доирасида премьера қилинди.
Аввалроқ давлатимиз раҳбари ташаббуси билан Кинематография агентлиги томонидан ўтказилаётган “Ипак йўли дурдонаси” XIII Тошкент халқаро кинофестивалида куни кеча Danmon Group компанияси (Дания) билан келишув имзоланганди. Шунингдек, “Бир кунлик тўй” комедияси премьераси бўлиб ўтгани, “Меҳр” операциясига бағишланган фильм премьераси бўлиб ўтгани ҳамда Ўзбек ва рус тилларида фаолият олиб борувчи юқори сифатли фильмлар ва сериаллар намойиш этиладиган онлайн кинотеатр яратилгани ҳақида хабар берилганди.
