Россияда ўзбекистонлик фуқаролар номаълум моддадан заҳарланди
Россия пойтахти Москвада жойлашган мигрантлар учун мўлжалланган ётоқхонада бир нечта мигрант ноодатий шароитда заҳарланди. Бу ҳақда “Mash” хабар берди.
Маълум қилинишича, ҳодиса оқибатида 1 киши вафот этган, 3 киши касалхонага ётқизилган. Таъкидланишича, хостел эгасига мигрантларнинг ўзини ёмон ҳис қилаётгани ҳақида ўша ерда яшовчилардан бири маълум қилган. Шундан сўнг маъмурият эгаси воқеа жойига етиб келган. Эшик қўнғироғи босилганда, ҳеч ким очмаган. Оқибатда эшикни бузиб, ичкарига киришган.
Хонада ўзбекистонлик фуқаролар ҳушсиз ҳолатда топилган. Воқеа жойига етиб келган тез ёрдам машинаси 3 кишини қутқаришга муваффақ бўлган. Аммо 1 кишини қутқариб қолишнинг имкони бўлмаган. Касалхонага ётқизилган 3 нафар фуқароларнинг аҳволи оғирлиги айтилмоқда.
Қайд этилишича, воқеа содир бўлган хонадонда заҳарланиш билан боғлиқ ҳоалтларга далил бўладиган бирор бир буюм топилмаган.
Аввалроқ Германияда 7 киши номаълум моддадан заҳарлангани ва Толяттидаги хостелда 23 нафар Ўзбекистон фуқароси заҳарлангани ҳақида хабар берилганди.
Чўлпоной Аҳмедова
