Зангиота юқумли касалликлар шифохонасида йил бошидан буён 377 нафар чақалоқ дунёга келди — ССВ
Сўнгги ҳафталарда Ўзбекистонда коронавирусга чалиниш кўрсаткичлари нисбатан пасаймоқда. Аммо аҳоли СOVID-19'га қарши етарли даражада эмланмаган бир шароитда хасталик хавфи юқорилигича қолмоқда. Соғлиқни сақлаш вазирлиги Зангиота 1-сон юқумли касалликлар шифохонасидаги ҳолатни ўрганди.
Муассаса директори Анвар Ҳусановнинг маълум қилишича, 15 октябрь ҳолатига кўра, бу ерда 1350 нафардан зиёд бемор муолажа олмоқда. Улардан 39 нафари ўта оғир, 219 нафари оғир, 933 нафари ўрта оғир ҳолатда. Шунингдек, жонлантириш бўлимларида 170 нафар бемор шифокор ва ҳамшираларнинг доимий назорати остида.
Қайд этилиишича, болалар ўртасида ҳам касалликка чалиниш кўрсаткичлари, афсуски, ҳануз юқори. Буни муассасада 18 ёшгача бўлган 167 нафар ўғил-қиз (жами беморларнинг 12,3 фоизи) даволанаётгани ҳам тасдиқлайди. Улардан 3 нафари айни пайтда жонлантириш бўлимида муолажа олмоқда.
Таъкидланишича, беморлар орасида 122 нафар ҳомиладор аёл ҳам мавжуд. Кеча бу ерда 2 нафар чақалоқ дунёга келди. Натижада йил бошидан буён Зангиота 1-сон юқумли касалликлар шифохонасида туғилган гўдаклар сони 377 нафарга етди.
Бундан аввал Зангиотадаги шифохоналарга волонтёрлар хайрия акциясига қўл ургани, хусусий тиббиёт клиникаларида даволанган 31 нафар COVID-19'га чалинган бемор оғир аҳволга тушиб қолгани ҳамда Ўзбекистонда фармацевтикага ихтисослашган янги универстет ташкил этилиши ҳақида хабар берилганди.
