Кекса аёлни чалғитиб, пулларини ўғирлаган фуқарога чора кўрилди
Зарафшон шаҳрида яшовчи кекса Марина Иванова нафақага чиққач, уй жойини сотиб, Россияда истиқомат қиладиган фарзандларининг олдига боришни режалаштиради.
Аёлнинг уйи 22 минг АҚШ долларига баҳоланиб, уни Зарафшон шаҳрида истиқомат қилувчи Азиз Арслонов сотиб олади ва 20 минг АҚШ долларини банк орқали унинг ўғилларига жўнатишда ёрдам ҳам кўрсатади. Шундан сўнг уй эгаси Россияга кетиши ҳақида айтганида: “Ўзим сизни Навоий шаҳридаги Халқаро аэропортига кузатиб қўяман”, — деб аэрочипта санаси етиб келганида Азиз Арслонов машинасида уй эгаси билан йўлга чиқади.
Йўлда Азиз машинаси бузилиб қолганини важ қилиб, телефон чироғини тутиб туришини сўрайди. Марина Иванова чироқ тутиб турган пайтда, машина салонидан ускуналар олган каби бўлиб, унинг сумкасидан 3 140 АҚШ долларини олиб қўяди. Манзилга етганда Марина Иванова ҳақ тўламоқчи бўлади va “саховатпеша ҳайдовчи” бу ишни чин кўнгилдан қилганини, пул тўлаш шарт эмаслигини айтади. Хурсандчиликдан боши кўкка етган аёл аэропортда текширувдан ўтаётганда пуллари йўқлигини билади. У шу пайтнинг ўзидаёқ ИИБ ТХТБ ходимларига хабар беради. Тезкор гуруҳ ёрдамида Азиз Арслонов ўз вақтида қўлга олинди.
Ҳозирда суриштирув ишлари олиб борилмоқда.
Аввалроқ, Туркияга келин бўлган ўзбек қизи тиллоларни ўғирлаб, уйидан қочиб кетгани ҳамда қашқадарёлик сохта харидор кассадаги пулларни ўмариб кетгани ҳақида хабар берган эдик.
Муножат Валиева
