Саакашвили мавзуси 30 октябрдан кейин кўпчиликнинг эсидан чиқиб кетади — Ираклий Кобахидзе
Бунга нима сабаб бўлиши айтилди.
Грузия ҳукмрон партияси – “Грузия орзуси” етакчиси Ираклий Кобахидзе Саакашвили Тбилисининг Украина билан муносабатларини қийинлаштирганини маълум қилди. Бу ҳақда “ТАСС” хабар берди.
“Михаил Саакашвили икки давлат муносабатларига ноқулайлик олиб кирган фактор бўлди”, – деган Кобахидзе. Шунингдек, у 30 октябрдан кейин Саакашвили мавзуси ноактуал бўлиб қолишига умид билдирган. Шу куни Грузияда маҳаллий муниципал сайловларининг иккинчи тури бўлиб ўтади.
”Сизни ишонтириб айта оламанки, Саакашвили мавзуси 30 октябрдан кейин кун тартибидан буткул тушиб қолади. Шундан кейин Украина ва Грузия ўртасидаги барча ноқулай ҳолатлар ҳам барҳам топади”, – деб таъкидлади сиёсатчи.
Маълумот ўрнида: Саакашвили 1 октябрь куни қамоққа олинган. У Грузияга 8 йиллик танаффусдан сўнг қайтиб келди. Саакашвили 2004-2013 йилларда мамлакатни бошқарган. Шундан кейин у Украина фуқаролигини қабул қилган ва бир қанча лавозимларда ишлаган.
Бундан аввал Саакашвили Грузияга нима учун келгани ҳамда унинг саломатлиги жиддий ёмонлашгани хабар қилинганди.
Жаҳонгир Қўзиев
