Автобус бекатлари даромад келтирадиган савдо нуқталарига айлантирилган. Йўловчилар учун эса шароит йўқ.
Ўзбекистон Монополияга қарши курашиш қўмитаси ҳузуридаги Истеъмолчилар ҳуқуқларини ҳимоя қилиш агентлиги Тошкент шаҳридаги автобус бекатларида текширув ўтказди.
Аниқланишича айрим автобус бекатлари даромад келтирадиган савдо нуқталарига айлантирилган. Бунинг оқибатида истеъмолчилар бекатларда автобусларни жазирама қуёш ёки ёмғир остида кутишига тўғри келмоқда.
Замонавий автобус бекатларида пандуслар деярли йўқ. Яна бир асосий камчилик бекатларда ўриндиқлар етарли миқдорда эмас. Меъёрий ҳужжатларда автобус бекатлари ўриндиқлар билан жиҳозланиши, улардан бири павильонда, қолганлари эса кутиш жойида ўрнатилиши, битта ўриндиқ камида 10 М.кв. майдонни эгаллаши белгиланган.
Шунингдек, ўрганиш жараёнида автобус йўналишларининг 91 фоизида хариталар, бекатларнинг 62,9 фоизида ахлат қутиси, 37,2 фоизида кутиш зали, 31,6 фоизида йўловчилар учун ўриндиқлар йўқлиги, 36,5 фоизида йўловчилар учун жой етарли эмаслиги ва 28,9 фоизи белгиланган санитария-гигиена талабларига жавоб бермаслиги маълум бўлди.
Бундан аввал "Тошкент транспорти" мобил иловаси ишга туширилгани ҳамда Тошкентдан "Ташморe"гача алоҳида йўлакда ҳаракатланувчи тезюрар автобуслар йўлга қўйилгани ҳақида хабар берилган эди.
