Фарзандларига алимент тўламай келаётган 5 ота иши судда кўриб чиқилди

 

Бугунгги кунда миллий қонунчилигимизда алимент тўлаш мажбуриятлари аниқ кўрсатиб қўйилган бўлса-да, лекин ҳаётда қонунга буйсунмаётган фуқаролар ҳам кўплаб учрамоқда.

 

Хусусан, Мажбурий ижро бюроси Хатирчи туман бўлими томонидан алимент тўловидан 42 миллион сўм миқдорда қарздорлиги мавжуд бўлган 5 нафар оталарга нисбатан тўпланган ҳужжатлар жиноят ишлари бўйича Хатирчи туман судига юборилган.

 

Суд томонидан жорий йилнинг 28 октябрида 5 нафар оталарга нисбатан  Маъмурий жавобгарлик тўғрисидаги кодекснинг 47-4-моддасида назарда тутилган хуқуқбузарликни содир қилган деб топилиб, уларнинг 4 нафарига нисбатан 15 сутка маъмурий қамоқ жазоси тайинланган ва 1 нафари жавобгарликдан озод қилинган.

 

Маълум қилинишича, фуқаролик ишлари бўйича Кармана туманлараро судининг 2014 йилнинг 17 сентябрдаги ижро ҳужжатига асосан қарздор А.Мақсудовдан Д.Ғаниеванинг фойдасига икки нафар фарзандининг моддий таъминоти учун 1/3 қисм миқдорида алимент ундириш тўғрисидаги ижро ҳужжати бўлим иш юритувида мавжуд бўлиб, жорий йилнинг октябрь ойига қадар  А.Мақсудовнинг алимент тўловларидан қарздорлиги 18 миллион 471 минг 656 сўмни ташкил қилиб, ушбу қарздорликни тўлашдан бўйин товганлиги сабабли, суд қарорига асосан А.Мақсудовга нисбатан 15 сутка маъмурий қамоқ жазоси тайинланган.

 

Бундан ташқари, фуқаролик ишлари бўйича Хатирчи туман судининг жорий йилнинг 17 февралдаги ижро ҳужжатига асосан қарздор А.Абдуллаев ундирувчи М.Собированинг фойдасига икки нафар фарзандининг моддий таъминоти учун 1/3 қисм миқдорида йиғилиб қолган 6 миллион 567 минг 495 сўм қарздорликни тўлашдан бўйин товлаб келган. Натижада қарздорга нисбатан маъмурий баённома расмийлаштирилиб, тўпланган ҳужжатлар жиноят ишлари бўйича Хатирчи туман судига юборилди. Қарздор суд мажлисида мавжуд қарздорликни тўлиқ тўлаганлиги сабабли жавобгарликдан озод қилинган.