Расман: Шавкат Мирзиёев Ўзбекистон Президенти сифатида қасамёд қилди

Айни дақиқаларда Олий Мажлис Сенатининг янги биносида Президентликка сайланган Шавкат Мирзиёевнинг инаугурация маросими бўлиб ўтмоқда.

Мажлисни Марказий сайлов комиссияси (МСК) раиси Зайниддин Низомхўжаев очиб берди. МСК раиси Ўзбекистоннинг сайланган Президенти Шавкат Мирзиёевга Президент гувоҳномаси ва Марказий сайлов комиссиясининг шаҳодатномасини топширди.

29 октябрь куни Марказий сайлов комиссияси Шавкат Мирзиёевни кейинги беш йилга Ўзбекистон Президенти лавозимига сайланган деб ҳисоблаш тўғрисида қарор қабул қилганди. Сайлов кодексига кўра, Ўзбекистон Президенти Марказий сайлов комиссияси томонидан Президент сайлови натижалари расмий равишда эълон қилинган кундан эътиборан кечи билан икки ой ичида Олий Мажлис палаталарининг қўшма мажлисида қасамёд қилган пайтдан эътиборан ўз лавозимига киришади.

Мажлислар залига тантанали равишда қуйидагилар олиб чиқилгани маълум қилинди:

— Ўзбекистон байроғи;

— Президент штандарти;

— Ўзбекистон Республикаси Конституцияси;

— Муқаддас Қуръони Карим;

— Президентлик белгиси.

Шавкат Мирзиёев қуйидагиларни алоҳида қайд этди: “Жонажон Ватанимиз тимсоли ва мустақиллигимиз рамзи бўлган давлат байроғимиз, мадҳиямиз ва гербимизга, менга топширилган Президентлик Олий нишони ва байроғига юксак ҳурмат бажо келтираман.

Ўзбекистон Республикаси Президенти лавозимига сайланишимни, Янги Ўзбекистонни барпо этиш йўлида олиб бораётган сиёсатимизнинг, юксак эътирофи сифатида қабул қиламан.”