ЕИ Польша чегарасида турган мигрантларга 700 минг евро ажратди
Бу маблағ энг зарурий маҳсулотларни сотиб олишга сарфланади.
Европа Иттифоқи Польша-Беларусь чегарасидаги қочқинларга 700 минг евро миқдорида ёрдам ажратди. Бу ҳақда Европа Комиссияси баёнотида сўз боради.
“ЕИ одамлар машаққатини камайтириш мақсадида ўз ҳамкорларининг гуманитар ёрдам беришини қўллаб-қувватлайди. Ҳар икки томондаги гуманитар ташкилотларнинг мигрантларнинг катта қисмига ёрдам бериши учун доимий шароит яратиб берилишига чақираман”, –– деган Еврокомиссар Янез Ленарчич.
Қайд этилишича, 700 минг евро Халқаро Қизил Хоч қўмитаси орқали келиб тушади. Бу маблағ озиқ-овқат маҳсулотлари, дори-дармон ва гигиена воситалари сотиб олишга сарфланади.
Маълумот ўрнида: 8 ноябрь куни Беларусдан Польша йўналишига қараб минглаб мигрантлар йўлга чиққан. Бунинг ортидан чегарага қўшимча полиция ва ҳарбий кучлар чақирилган. Польша ва Болтиқбўйи давлатлари Беларусни вазиятни атайин чигаллаштиришда айбламоқда. Ҳозир Литва чегара ҳудудларда фавқулодда ҳолат жорий этган.
Аввалроқ Польшада суриялик эркакнинг жасади топилгани ҳамда Польша чегарага 10 минг аскар жойлаштиргани ҳақида хабар қилинганди.
Жаҳонгир Қўзиев
