Абитуриентларнинг мактабдаги баҳолари ОТМга киришда ҳисобга олинади

 

19 ноябрь куни 696-сонли қарори билан тасдиқланган "Таълим ташкилотлари битирувчилари баҳоларининг ўртача кўрсаткичини ҳисоблаш ва уни олий таълим ташкилотларига кириш имтиҳонларида инобатга олиш тартиби тўғрисида"ги низомга мувофиқ, мактаб ўқувчилари шаҳодатномасидаги 11 йиллик таълимнинг сўнгги 6 йиллик баҳолари ОТМ га киришдаги баллга қўшилади.

 

Баҳолар электрон платформалар орқали ҳисобланиб, Давлат тест марказининг "ABITUR" дастурига юборилади. Баҳоларнинг ўртача кўрсаткичи 6-11 синфлардаги ёки 6-9 синфлар ва 1-2 босқичлардаги йиллик баҳоларнинг умумий йиғиндисини ўқитилган фанларга бўлиш орқали ҳисоблаб чиқарилади.

 

Максимал балл 100 фоиз деб олинади ва баллар баҳо тизимига қуйидагича ўтказилади:

• 86-100 % учун – 5 баҳо;
• 71-85 % – 4 баҳо;
• 56-70 % – 3
• 56 % гача – 2 баҳо.

 

Ушбу тартиб 2022-2023-ўқув йилидан бошлаб амалга жорий этилиши таъкидланмоқда.

Аввалроқ, талабалар учун қайта топшириш тўғрисидаги аризалар йиғилишига қараб бир ўқув йилда икки мартагача давлат имтиҳонларини қайта топшириш имконияти яратилгани ҳақида хабар берилганди.
 

 

Мафтуна Режаббоева