“...Қонунчилик палатасидан сўранг, дўстим. Бизда йўқ...”
Сенатор Наримон Умаров "Давлат тили тўғрисида"ги қонун янги таҳрирда Сенатга ҳали кирмаганини маълум қилди.
Янги таҳрирдаги “Давлат тили тўғрисида” ги қонун 2021 йил 26 июн куни Сенат ялпи мажлисида маъқулланган эди. Маълумки, 19 ноябрь куни АОКА мажлислар залида Олий Мажлис Сенати аъзолари иштирокида матбуот анжумани бўлиб ўтди. Унда журналист Сенат томонидан 5 ой олдин маъқулланган “Давлат тили тўғрисида”ги Ўзбекистон Республикасининг Қонунига ўзгартиш ва қўшимчалар киритиш ҳақида”ги қонуннинг қачон амалиётга татбиқ қилиниши ҳақида сўраган. Шунда сенатор Наримон Умаров:
“Давлат тили тўғрисида”ги қонун янги таҳрирда бизга кирмаган. Буни кимлардир ишлаётганидан хабаримиз бор. Лекин бу ҳали лойиҳа сифатида ҳам кўрилмаган. Маълумотингиз учун, Қонунчилик палатасидан бизга ҳали кириб келмаган” – дея бу саволга жавоб беришни кескин рад қилди.
Бундан ташқари, Сенат аъзоси:
“Биз кеча-кундуз Сенатда ўтириб ишлаймиз, сиз эса ёдингизга бир келганда Сенат билан гаплашасиз. Кирган бўлса, айтардик. Кирган дердик. Қонунчилик палатасидан сўранг, дўстим. Бизда йўқ. Нима, ёш болага ўхшаб бир-биримизни аниқлаштирамизми энди? Кимдир сайлов олдидан қонунда ўзгариш қиламан деб юрибди, лекин бу ҳали ўзгариш дегани эмас. У қонун ҳали кириши керак, лойиҳа сифатида қабул қилиниши керак”.
Ваҳоланки, мазкур анжуманда 10 дан ортиқ сенатор иштирок этган. Аммо улар сукут сақлашни маъқул кўрган.
Маълумот учун: “Ўзбекистон Республикасининг Давлат тили тўғрисида”ги қонунига ўзгартиш ва қўшимчалар киритиш ҳақида”ги қонун лойиҳасини Қонунчилик палатаси шу йилнинг 24 март куни қабул қилган. Қонун 26 июн куни Сенатнинг 16-ялпи мажлисида муҳокама қилинган ва маъқулланганлиги Сенатнинг расмий сайтида эълон қилинган.
Конституциянинг 84-моддасида Сенат маъқуллаган қонун имзоланиши ва эълон қилиниши учун 10 кун ичида президентга юборилади. Қонун президент томонидан 30 кун ичида имзоланади ва эълон қилинади.
Эслатиб ўтамиз, аввалроқ Сенат томонидан икки нафар судья Олий суд судьялигига тасдиқлангани ҳамда жорий йил учун давлат бюджети харажатларига оид ҳужжат тасдиқлангани ҳақида хабар берилагнди.
Чўлпоной Аҳмедова
