АДУ биносининг 4 қаватидан аёл киши эҳтиётсизлик оқибатида тушиб кетди

 

Андижон давлат университети биносининг 4 қаватидан аёл киши эҳтиётсизлик оқибатида тушиб кетди. Бу ҳақда олийгоҳ маъмурияти хабар берди. 

Маълум қилинишича, бугун cоат 14:00 атрофида ижтимоий-иқтисодиёт факультети талабаларининг ота-оналари учун мажлис ўтказилган. Йиғилиш университетнинг 1000 ўринли биноси 4 қаватидаги кичик мажлислар залида бўлиб ўтган. Талабалардан бирининг келинойиси йиғилиш бўлаётган вақтда қўнғироқ бўлиб қолгани сабабли мажлисдан чиқиб, телефонда суҳбатлашган.

 

Айни вақтда ўша қаватда бинонинг зина тутқичларини янгисига алмаштириш ишлари амалга оширилаётган бўлган. 

 

Аёл телефонда суҳбатлашиш жараёнида қурилиш бўлаётган ҳудудни англатувчи белги ва тўсувчи тасмаларга аҳамият бермасдан зина томонга юрган ва эътиборсизлик оқибатида тушиб кетган. Бунда қурилиш-таъмирлаш ишлари олиб борилаётган ҳудуд тўлиқ беркитиб қўйилмаганлиги, тўсиқ ленталарига эса эътибор бермаслиги ҳам сабаб бўлган.

 

Ҳодиса юз берган вақтнинг ўзидаёқ университетнинг масъул ходимлари томонидан шошилинч тез ёрдам чақирилиб, фуқаро республика шошилинч тез тиббий ёрдам илмий маркази вилоят филиалига олиб борилган ва биринчи ёрдам кўрсатилган.

 

Жавоҳирбек Турсунов