Илк бор ўтказилган Конституция имтиҳони ғолиблари тақдирланди

 

Бугун, 6 декабр куни Адлия вазирлигида Ўзбекистон Республикаси Конституцияси қабул қилинганлигининг 29 йиллигига бағишланган тантанали тадбир бўлиб ўтди. Унда вазирлик ҳамда Конституциявий суд ҳамкорлигида ўтказилган умуммиллий Конституция имтиҳони ғолиблари тақдирланди.

 

Мазкур имтиҳонда жами 50 минг нафардан ортиқ иштирокчи рўйхатдан ўтди. Дастлабки босқичда иштирокчиларнинг ижодий саволларга жавоблари баҳоланиб, улардан 10 нафари финал босқичига йўл олди. Финал босқичида сараланган 10 нафар қатнашчининг ҳуқуқий билимлари суҳбат асосида синовдан ўтказилди.

 

Сўнгги босқичда 289 балл тўплаган пойтахтлик иштирокчи 3-ўринни, 313 балл тўплаган жиззахлик иштирокчи 2-ўринни, 328 балл тўплаган қашқадарёлик иштирокчи 1-ўринни эгаллади.

 

Ташкилотчилар томонидан 1-ўрин ғолибига 15 миллион, 2-ўрин ғолибига 10 миллион, 3-ўрин ғолибига 5 миллион сўм пул мукофотлари берилди.

 

Шунингдек, тадбирда “Ҳуқуқий тарғибот ишлари аълочиси” кўкрак нишони ўз соҳибларига топширилди. Ушбу нуфузли мукофот билан аҳоли орасида ҳуқуқий маданиятни кенг тарғиб қилишда жонбозлик кўрсатиб келаётган турли касб эгалари ва жамоатчилик фаоллари тақдирландилар.

 

Жавоҳирбек Турсунов