56 ёшли эркак норасмий никоҳ сабаб аёлга ОИВ касаллигини қасддан юқтирди

 

Бухоро вилояти Шофиркон туманида яшовчи эркак била туриб ўзгага ОИВ касаллигини қасддан юқтирганликда айбланмоқда. Бу ҳақда Бухоро вилояти Ички ишлар бошқармаси ахборот хизмати маълум қилди.

 

Маълумотларга кўра 1965 йилда туғилган фуқаро вилоят ОИТСга қарши курашиш марказида 2015 йилдан буён рўйхатга турган.

 

Бошқа шахсларга инфекцияни юқтирганлик учун жиноий жавобгарликка тортилиши тўғрисида огоҳлантирилган бўлишига қарамасдан, 2018 йилнинг ноябрь ойидан ҳозирги кунга қадар 1972 йилда туғилган аёл билан никоҳсиз яшаб, доимий жинсий алоқада бўлиб келган. Била туриб ўша аёлга ОИВ касаллигини қасддан юқтирганлиги аниқланган.

 

Мазкур ҳолат юзасидан туман ИИБ ҳузуридаги тергов бўлинмаси томонидан ЖК.нинг 113-моддаси 4-қисми билан жиноят иши қўзғатилиб, ушбу шахснинг бошқа шахсларга ҳам ОИВ инфекциясини юқтирган юқтирмаганлигини аниқлаш юзасидан дастлабки тергов ҳаракатлари олиб борилмоқда.

 

Аввалроқ ОИВ ва Гепатит С ташхиси учун мобил лаборатория ишга туширилгани ҳақида хабар берилганди. 

 

Муножат Валиева