Ўзбекистон ва Қозоғистон “Chevrolet” ишлаб чиқаришда 65 миллион доллар инвестиция ажратади
“Ўзавтосаноат” АЖ машинасозлик соҳасида Қозоғистон билан 500 миллион доллардан ортиқ ҳамкорликка эришилди.
Маълумки, икки давлатнинг етакчи машинасозлик компанияси бу — “Ўзавтосаноат” АЖ ва “Аллур” компаниялар гуруҳи ўртасида “SaryarkaAvtoProm” Қўстанай заводида “Chevrolet” енгил автомобиллари кичик тугунли (SKD) ишлаб чиқаришни ташкил этишни назарда тутувчи ҳамкорликнинг янги босқичига ўтиш бўйича келишилди.
Мазкур лойиҳа иқтисодиётининг маҳаллийлаштириш ва экспорт салоҳиятини ошириш имконини беради. Икки компаниянинг сармоявий ва иқтисодий фаолиятини қўллаб-қувватлаш бўйича эришилган келишувлар босқичма-босқич амалга оширилади.
“Ўзавтосаноат” Қозоғистоннинг автотранспорт ишлаб чиқарувчи “Qaztehna” МЧЖ билан 15 миллион долларлик шартнома ҳам имзолади. Шунингдек, Қозоғистонда ишлаб чиқарилаётган маҳсулотлар турини кенгайтириш мақсадида “Qaztehna” негизида “SINOTRUK HOWO” юк автомобилларини ишлаб чиқарилади.
Эндиликда, машинасозликнинг асосий йўналишларидан ташқари Қозоғистон компаниялари билан ҳам Ўзбекистон Республикаси автомобиль бозорида замонавий рақамли ечимларни жорий этиш бўйича 50 миллион долларлик келишувларга эришилди.
Маълумот учун: 2020 йил март ойидан бошлаб “UzAuto Motors” билан биргаликда Қўстанайда “Chevrolet” русумли автомобилларни ишлаб чиқариш йўлга қўйилган.
Жорий йилда эса “SariarqaAvtoProm” заводи “SamAuto” компанияси билан биргаликда “SAZ LE 60” русумли паст полли автобусларни ишлаб чиқармоқда.
Бундан ташқари, “UzAuto Motors” томонидан ишлаб чиқарилган автомобиллар Қозоғистонда энг кўп сотилган автомобиллар рейтингида етакчи ўринларни эгаллаган.
Эслатиб ўтамиз, аввалроқ Ўзбекистон ва Қозоғистон ўртасида декларация имзолангани ҳамда Шавкат Мирзиёевнинг Қозоғистонга ташрифи якунлангани ҳақида хабар берилганди.
Чўлпоной Аҳмедова
