“Аmirsoy Ekspress” ишга тушди
Тошкент вилоятидаги “Амирсой” тоғ-чанғи курортида янги “Аmirsoy Ekspress” дор йўли расман ишга туширилди.
Унинг очилиш маросимида Бош вазир ўринбосари – туризм ва спорт вазири Азиз Абдуҳакимов иштирок этди. Шунингдек, Туризм ва спорт вазирлиги томонидан маҳаллий ва хорижий оммавий ахборот воситалари вакиллари учун пресс-тур ҳам ташкил этилди.
Гондола тоифасига кирувчи мазкур дор йўли дунё миқёсида машҳур ишлаб чиқарувчи - “Доппелмайр” компанияси томонидан яратилган. Замонавий дизайн, инновацион хавфсизлик компонентлари ва энг юқори сифатли пўлат ускуна дам олиш масканига ташриф буюрувчилар учун қулайлик ва хавфсизликни кафолатлайди. Салонларнинг панорам ойналари йўловчилар олдида ўзига хос айланма кўриниш ҳосил қилиб, уларга ўзларини табиат билан ҳамнафасдек ҳис қилиш имконини беради.
“Аmirsoy Ekspress” ташриф буюрувчиларни автомобиль йўлидан тўғридан-тўғри курорт ҳудудига етказиб қўяди, бу эса узоқ масофали тоғ йўлини четлаб ўтиб, ҳайдовчилар учун 5 кмга қисқартиради. Унинг умумий узунлиги 2913 метр бўлиб, соатига 2400 кишини ташиш қувватига эга. Саёҳат вақти 9 дақиқани ташкил этади.
Дор йўлининг тўсиқсиз дизайни болалар аравачалари, ногиронлар аравачалари ёки спортнинг қишки турлари билан шуғулланиш учун муқобил қишки спорт жиҳозларини ташишни осонлаштиради. Дам олиш масканига ташриф буюрувчилар ва “Аmirsoy Ekspress” йўловчиларига қулайлик яратиш мақсадида бепул автотураргоҳ ташкил этилган.
Аввалроқ, махсус “Cалл-маркази” ишга туширилгани ва фармасевтика тармоғидаги лойиҳалар кўриб чиқилгани ҳақида хабар берилганди.
Жамшидбек Амиров
