Ким Чен Иннинг отаси “шаурма”ни кашф қилган(ми?)
КХДР матбуоти “шаурма” 2011 йилда Ким Чен Ир томонидан ихтиро қилинганини айтмоқда.
Бу ҳақда The Independent хабар тарқатди.
Нашрнинг ёзишича, маҳаллий матбуот 2011 йил Пхеньянда кўча таомлари кўпайиб кетгани ҳақида ёзар экан, КХДР пойтахтидаги “Кумсонг” озиқ-овқат заводи ёнидаги савдо растасида гўшт тўлдириб, буғдой унидан тайёрланган “шаурма” еяётган Шимолий кореяликлар ҳақида сўз юритади.
Шундай маҳаллий нашрлардан бири “Rodong Sinmun” газетаси бўлиб, у ҳам айнан Ким Чен Ирни мазкур таом асосчиси дея таърифлайди.
“У(Ким Чен Ир) одамларга гўшт тўлдириб, буғдой унидан тайёрланган пишириқлар билан хизмат қилишни буюрди. Унинг “…халқимизга ёзда минерал сув, қишда эса иссиқ чой билан ейиладиган “гўштли нон” билан хизмат қилинса, янада ёқимли бўлар эди”, деган сўзларини эслаймиз ", - деб ёзади газета.
Шунингдек, мақолада ёзилишича, КХДРнинг амалдаги раҳбари Ким Чен Ин “ишлаб чиқаришдан тортиб то хизмат кўрсатишгача бўлган ясси нонларга катта қизиқиш билдирган ва бунинг учун чора кўрган”.
Аввалроқ Шимолий Корея қора оққуш гўшти ёрдамида очликка қарши курашмоқчилиги ҳамда Ким Чен Иннинг саломатлиги жойидалиги ҳақида хабар берилганди.
Оламгир Абдиев
