Энди Англия ва Уэльсда эмизикли оналарни уларнинг розилигисиз суратга олиш жиноят ҳисобланади

 

Мазкур жиҳатларни ўз ичига олган қонун лойиҳаси “эмизикли оналарнинг ғалабаси” деб аталган ва олқишлар билан қабул қилинган.

 

Маълумотларга кўра, қонун лойиҳасига сабаб бўлувчи ҳаракатни манчестерлик дизайнер Жулиа Купер бошлаб берган.

 

“Мен қизимни овқатлантириш учун маҳаллий паркдаги ўриндиқлардан бирига ўтирдим. Диққатим фақат фарзандимда бўлгани сабаб бошқа ўриндиқда ўтирган эркакни пайқамадим. Бошида “у менга қарамаяпти” деган умидда орқага ўгирилдим. Аммо адашган эканман. Нотаниш эркак сурбетларча рақамли камераси билан мени суратга ола бошлади”, - дейди у.

 

Купернинг айтишича, у бу ҳолатдан жуда ҳайратга тушган ва шаҳар полициясига мурожаат қилган. Афсуски, ҳуқуқни муҳофаза қилувчилар бу ҳолатда ҳеч қандай жиноят содир этилмаганини шунинг учун ҳеч қандай чора кўролмаслигини айтишган.

 

"Бу вазиятда ўзимни жуда таҳқирланган сездим. Аксига олиб, полиция ҳам ҳеч қандай ёрдам бера олмади. Фарзандимни овқатлантираётган ҳолатимни суратга олаётган эркакнинг қилмишидан жуда ғазабландим. Бу ғоят даражада разиллик эди. Нимадир қилишим кераклигини англадим”, - дейди Купер.

 

Шундан сўнг, аёл Лейбористлар партияси депутати Джефф Смит ва унинг ҳамкасби Стелла Кризи билан боғланиб, вазиятни тушунтирган. Бундай вазиятлар учун қандайдир чора кўрилиши лозимлигини талаб қилган.

 

Бошида кўплаб баҳс-мунозараларга сабаб бўлган қонун лойиҳаси охир-оқибат тасдиқланди.

 

“Бу эмизикли оналарнинг ғалабасидир. Энди бизни бегоналар ўзлари хоҳлаганча суратга ва видеога олишолмайди. Ёш болали оналар жамоат жойида ўзларини ноқулай ҳис қилишларига чек қўйилди” – дейди Купер қонун лойиҳаси тасдиқлангандан сўнг. 

 

Аввалроқ аёлларни зўравонликдан ҳимоя қила оладиган "Ҳимоя ордери" жорий қиладиган ҳақида хабар берилганди.

 

Оламгир Абдиев