Чирчиқда банк ходимини "кийдириб кетишди"
Фуқаро қалбаки ҳужжатлар билан банкдан 4 миллиард сўм кредит олиб, эҳтиёжлари учун ишлатиб юборган.
Бош прокуратура ҳузуридаги Департаментнинг Чирчиқ шаҳар бўлими томонидан терговга қадар текширув щтказилди. Унда “G.I.” МЧЖ раҳбари Ж.Э. “I.” МЧЖга тегишли 3-қаватли нотурар жой биноси интернет сайтлари орқали сотувга қўйилганлигидан фойдаланиб, объектнинг кадастр ҳужжати, МЧЖ раҳбарининг имзо ва муҳрини қалбакилаштириб, ушбу ҳужжатлар орқали бинони гаров таъминоти сифатида қўйиб, банкдан 4 миллиард сўм олгани аниқланди.
Тижорат банки филиали масъул шахслари Ж.Э. томонидан тақдим этилган ҳужжатларни тўлиқ ўрганмаган ҳамда кредит маблағининг мақсадли сарфланиши мониторинг қилинмагани оқибатида, тадбиркор ва банк манфаатларига 4 ммиллард сўм зарар етказилган.
Ҳозирда мазкур ҳолат юзасидан Жиноят кодексининг 168-моддаси (фирибгарлик) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) ва 207-моддаси (мансабга совуққонлик билан қараш) билан жиноят иши қўзғатилиб, тергов ҳаракатлари ўтказилмоқда.
