Охирги гаплар Ортиқхўжаевга ортиқча бўлди
Шаҳар ҳокими турли гаплардан чарчаганини айтди.
Жаҳонгир Ортиқхўжаев шаҳар ҳокимиятидаги ҳомийлик масаласида баёнот берди. У сўзи аввалида сиёсат билан умуман шуғулланмаганини эслатиб ўтди.
Шу билан бирга, ҳоким Ўзбекистон фуқароси ва “бозори ҳам, мозори” шу ер эканини таъкидлади. Унинг сўзларига кўра, сўнгги 3,5 йил давомида у ўтмишда бошқарган компаниялар кўп соҳаларда ҳомийлик қилиб келмоқда.
“Риё ва савоб деган тушунчалар бор... бу дунёда қилаётган ишларимизни айтсак, савоб эмас, риё бўлади. Шу сабабли, кўп нарсани шу кунгача айтмадим. Аммо бу масалани кўпчилик суриштирди. Akfa, Artel кўп нарсалардан воз кечди. Масалан, бу йил Ecobozor сотилди. Унинг ярми қарзларни ёпишга сарфланган бўлса, қолгани ҳомийликка берилади”.
Ортиқхўжаев Akfa Medline компанияси томонидан амалга оширилган хайрия ишларига ҳам тўхталди. Хусусан, ушбу клиника 2021 йилда 75 нафар юрак хасталиги бор болаларни бепул операция қилган.
Ҳоким бу йил ҳам Akfa ва Artel томонидан ҳомийлик масаласида таклифлар берилгани, уларнинг сотилган активларидан ярми шаҳарни ободонлаштиришга йўналтирилаётгани маълум қилди.
“Олти ойда 80 миллиард сўмлик ёрдам кўрсатилади”,– деди у.
Ортиқхўжаев бу каби масалалардан чарчаганини айтди.
“3,5 йил ишлаган бўлсам, бир сўм пулга хиёнат қилмадим. Олдимдан қўшдим, топганимни бердим. Бир сўм пул олмадим.
Ҳоким бўлишимдан олдин 35 та машинам бор эди. Ҳозир 6 та қолди. Яқинда яна бир автомобилимни аукционга қўяман. Ундан тушган пулни юраги хаста болалар операциясига ишлатамиз. Агар булар гуноҳ бўлса – мен розиман” , – деган Ортиқхўжаев.
