Туркман газини Жанубий Осиёга етказиб берувчи ўтказгич қурилиши қачон бошланади?
"Толибон" бу бўйича Туркманистон билан музокара ўтказди.
Яқин кунларда ТАПИ газ қувури лойиҳаси амалга оширилиши бошланади. Бу ҳақда “Sputnik Афганистан” хабар берди.
Унга кўра, Афғонистон мудофаа вазирлиги вакиллари туркман томони билан лойиҳа хавфсизлиги бўйича музокара ўтказган. Туркманистон томонидан музокараларда Афғонистондаги элчи Хўжа Овезов ва TAPI Pipeline Company Ltd. Консорциуми ижрочи директори Муҳаммедмурод Аманов иштирок этган.
Маълумот ўрнида: Туркманистон — Афғонистон — Покистон — Ҳиндистон газ қувури. “Толибон” ҳокимият тепасига келгач, бу йўналишни тезроқ амалга ошириш мақсадида бир қанча музокаралар ўтказилди. Толиблар раҳбарияти ҳам лойиҳанинг қай даражада муҳим эканини яхши англайди.
Масалан, АФғонистон мудофаа вазири вазифасини бажарувчи, "Толибон" ҳаракати асосчиси Мулла Умарнинг ўғли Мулла Ёқуб ТАПИ учун исталган қурбонликка тайёрлигини маълум қилган.
Ушбу лойиҳани амалга ошириш 2015 йилдан бошланган. Унинг умумий қиймати 10 миллиард долларни ташкил этади. Газ қувури умумий узунлиги 1814 километр. У орқали йилига 30 миллиард кубометр газ экспорт қилиш мумкин. Маълумотларга кўра, Афғонистон бу лойиҳа амалга ошса, йилига 500 миллион доллар фойда олади.
Эслатиб ўтамиз, аввалроқ Ашраф Ғани Афғонистонга қайтмаслиги маълум қилинганди.
