“Биз Путинни тўхтата оламиз”
Жаҳон спортчилари Россия билан Украина ўртасидаги зиддиятга муносабат билдирди.
Россиянинг Украина ҳудудига бостириб кириши бутун дунёнинг эътибор марказида турибди. Уруш сабаб таниқли украиналик ва хорижий спортчилар Россияга нисбатан кескин муносабатини билдиришди.
Биринчилардан бўлиб украиналик дзюдочи Дариа Билодид сўзга чиқди:
“24 февраль куни соат олтида Киевдаги отишмалардан уйғониб кетдим. Жуда ҳам қўрқдим. Мен оилам ва ватаним учун ибодат қиламан. Россия бизни бомбардимон қила бошлади, уруш бошланди. Яқин вақтгача мен бундай бўлиши мумкинлигига ишонмасдим. Нега улар одамларнинг ҳаётини бузиши керак? Биз тинчликни хоҳлаймиз, яшашни хоҳлаймиз”.
Теннисчи Сергей Стаховский Украина учун ибодат қилишга ундади:
“Биз Украина учун ибодат қиламиз”.
Афсонавий боксчи Владимир Кличко ҳам ўз муносабатини билдирди:
“Дунё империализмнинг нафақат Украина учун, балки бутун дунё учун қанчалик ҳалокатли эканини кузатмоқда. Бу барчага сабоқ бўлсин”.
Каратэчи Анжелика Терлюга қон тўкилишини тўхтатишга чақирди:
“Россия Украинага қарши кенг кўламли уруш бошлади. Украина ўзини ҳимоя қилади ва ғалаба қозонади. Биз Путинни тўхтата оламиз”.
“Динамо Киев” футбол клуби раҳбари Виктор Тсйганков украиналик ҳарбийларни қўллаб-қувватлади:
“Буларнинг барчаси биз билан содир бўлаётганига тўлиқ ишонмайман. Лекин мен Украинани ҳар қачонгидан ҳам яхши кўраман ва украиналик эканлигимдан фахрланаман. Бу бизнинг уйимиз ва уни биздан ҳеч ким тортиб ололмайди. Чегараларимизни ҳимоя қилаётган қаҳрамонларимизга шон-шарафлар. Яшасин Украина”.
Сузувчи Андрей Говоров украина армиясининг кучига ишонади:
“Украина армияси душманга қаршилик кўрсатиш учун барча имкониятларга эга эканига аминман. Агар Грузия ва Чеченистонга қарши 2008 йилги можароларни солиштирсак, бу урушда ғалаба қозониш учун Россияга кўпроқ куч керак бўлади”.
“Зенит” клуби ҳимоячиси Ярослав Ракитский ҳам Украинани қўллаб-қувватлади.
Украина футбол клубларининг хорижлик мутахассислари ҳам ўз фикрларини билдиришди. Масалан, Киевнинг “Динамо” клуби бош мураббийи Мирча Луческу Украина пойтахтини тарк этишни режалаштирмаётганини айтди:
“Украинадаги барча спорт тадбирлари 30 кунга тўхтатилди. Мен Киевни тарк этмайман ва Руминияга қайтмайман. Мен қўрқоқ эмасман. Аҳмоқлар бошлаган бу уруш тезроқ тўхтатилади деган умиддаман. Уруш бошланишини ҳеч ўйламагандим”.
Украина терма жамоаси ва “Шахтёр” клубининг собиқ футболчиси Дентинё ҳам Украина учун ибодат қилишини билдирди.
Чанғи бўйича жаҳон юлдузи Ёханнес Клабо ҳам Россиянинг ҳарбий тажовузкорлигини қоралади:
“Ҳозир Украинада содир бўлаётган воқеалар қўрқинчли ва мен буни қоралайман. Бўлаётган воқеалар ҳақиқатга тўғри келмайди. Бу ҳолат дунёни хавфли вазиятга солиб қўйди”.
Шунингдек, Клабо ҳамда унинг жамоадоши Ханс Кристер Ҳолунд Тюмендаги жаҳон чемпионатини бекор қилишга чақирди.
Формула 1 бўйича 4 карра жаҳон чемпиони Себастян Феттел Россия Гран-присини бойкот қилмоқчи:
“Украинадаги янгиликлардан ҳайратдаман. Маълумки, бизнинг тақвимимизга кўра, Россияда пойгамиз бор. Лекин мен у ерга бормайман".
Таниқли рус шарҳловчиси Василий Уткин ҳам урушдан ҳайратда қолганини маълум қилди:
“Ҳаётимдаги энг ёмон кун. Умримда бундай кунга гувоҳ бўламан деб ўйламаган эдим”.
Германия футбол клублари ҳам Украинани қўллаб-қувватлашди:
“Биз ҳайратдамиз. Россиянинг Украинага ҳужумидан кейин Европа ичида уруш авж олди. Бизнинг ҳамдардлигимиз ва бирдамлигимиз Украина халқигадир”, — дея Вердер клуби баёнот берди.
“Боруссия Дордмунд” клуби расмийлари ҳам қуйидагича фикрлар билдирди:
“Европа қитъасида уруш бошланганидан ҳайратда ва қайғудамиз. Дортмунднинг “Боруссия” клуби халқаро ҳуқуқнинг қўпол равишда бузилишини кескин қоралайди. Биз Украина халқи биланмиз”.
Шунингдек, титул ҳомийси “Газпром” бўлган “Шалке” клуби ҳам баёнoт билан чиқди. Клуб футболкаларига “Газпром” логотипини қўйишдан бош тортди.
