Вашингтон украиналик қочқинларни қабул қилган давлатларга катта маблағ бермоқчи
Бунинг учун махсус фонд тузилади.
АҚШ Украина ва қочқинларни қабул қилаётган давлатлар учун фонд тузади. Бу ҳақда АҚШ давлат котиби Энтони Блинкен Молдавия президенти Мая Санду билан учрашув якунлари бўйича брифингда маълум қилди.
Ушбу фондга 2.5 млрд доллар маблағ жалб этилади. Давлат котибининг сўзларига кўра, ушбу жамғармани тузиш учун Байден администрацияси шошилинч қарор қабул қилган.
Блинкен Молдавияга қочқинлар масаласида ёрдам кўрсатилишини айтган. Шунингдек, у Кишинёвнинг хатти-ҳаракатлари “ҳурматга сазовор” эканини қайд этган.
Маълумот ўрнида: 24 февраль куни Россия Украинада махсус ҳарбий операция бошлагач, кўплаб украиналиклар мамлакатни тарк этди. БМТ маълумотларига кўра, уларнинг сони 1.5 миллиондан ортиқ. Қочқинларнинг аксарияти Польшага кетган. ЕИ украиналикларга 1 йилдан 3 йилгача Евроиттифоқ ҳудудида қолишига рухсат берди.
Аввалроқ Путин Украинага қарши операцияни бошлаш қийин қарор бўлганини маълум қилганди.
